A lo llargo de la mañana del próximu sábadu 10 d'avientu, una Caravana pola Oficialidá va percorrer les carreteres y los llugares del Cabu Peñes, saliendo del Faru Peñes a les 11:30.
Trátase d’una acción festiva y reivindicativa que quier visibilizar y denuciar la situación de marxinación, acosu y falta de derechos que sufre la llingua asturiana y les persones que quieren usala.
Esto vamos facelo al traviés d’estos percorríos informativos per dellos conceyos y partes d’Asturies. Vamos facelo informando y esixendo lo necesario, que ye'l reconocimientu de los derechos fundamentales de la ciudadanía, que ye la declaración del asturianu como llingua oficial.
Nos últimos meses, como siempre, l'asturianu vien sufriendo agresiones d'instituciones y grupos que tendríen que tar dedicándose a defender el futuru de la nuestra llingua y los derechos de les persones falantes, pero dedíquense a lo contrario. Dende la Delegación del Gobiernu y dende determinaos partíos políticos apuesten por atacar los más mínimos avances y por facer el xuegu a lo más minoritario, casposo, rancio y ultra de la nuestra sociedá.
Por eso, tamién como siempre, hai que dar una respuesta a estos ataques sistemáticos a los derechos de tola ciudadanía, hai que denunciar esta situación de bochornu que llevamos viviendo dende décades, hai que camudar esta situación y dir a un tiempu nuevu de derechos reconocíos y d'un futuru aseguráu pal nuestru idioma.
D'esta manera llamamos a participar na Caravana pola Oficialidá que convoca la Xunta pola Defensa de la Llingua Asturiana y qu'esti sábadu 10 d'avientu va salir del Faru Peñes a les 11:30, y va acabar a les 14:00, depués de recorrer una bona parte de les carreteres y los llugares más importantes de los conceyos de Gozón y Carreño.
¡La oficialidá va rodao!. ¡L'asturianu, llingua oficial!
Xunta pola Defensa de la Llingua Asturiana
