Los oricios fácenme recordar lo vieyu que soi y toi. Pasó como un soplu, fue en 1982. Entós taba de presidente del Bañugues C. F. Toles perres de la cestina del mariscu que rifábamos los domingos y les del Festival del oriciu diban pa los dos equipos de fútbol. Nun algamaba pal 1º rexonal y pal xuvenil.
Agora'l festival «chuta» y va vientu'n popa.
Dende l'año pasáu ta de presidenta Esther, la fía del mio amigo Fasio, que'n paz descanse. Yo sigo de relaciones públiques. Munchos de los que entamaron conmigo palmáronla.
Con categoría fue'l primer festival d' Asturies gracies a l'asociación de vecinos «El Pico».
El festival ya una gozada, faise al llau de la playa. Munchos entamen a xintar oricios cola mente nes foles del branu pasáu en Bañugues, Lluanco y dalgunos nel «campi». La «crisis» ta al acechu. Desemúlase colos oficios, la danza sal de la panza.
L'oriciu ye la «pata negra» del pedreru, el caviar del mar, ye un bocáu de cardinale. Al xintar los oricios ye como si te bañases por dentro.
Si llueve hai p'atechase y xintar sentáu.
Hai oricios cocíos, empanaes y tortielles de güevares de oriciu y postre.
Ye como un chigre onde fartucate: ye baratu y así aprovecháis pa dar un paseín pol cabu Peñes, pa ver el muséu que ye una pasada.
Collacios, hai que dir al XXVIII Festival del oriciu de Bañugues y que'l Cristo del Socorro nos dé la manu pa machacar la crisis como a un pulpu.
Pasailo tos perbien y que aproveche, una vez al año nun fai dañu.
JOSÉ RAMÓN CRIADO, «RASSÉ» FUNDADOR DEL FESTIVAL DEL ORICIO DE BAÑUGUES.
No hay comentarios:
Publicar un comentario