.........HUMBERTO GONZALI: "Madre de canes fríes"
Dientro de les Fiestes del Cristu de Candás, y nel Día Grande que ye’l 14 de setiembre, desarróllase la tradicional Alborada, que nesta edición tendrá como Poeta del Alba al escritor, xestor cultural y coordinador de L’Arribada, el mierense Humberto Gonzali.
El que será "Poeta del Alba" Humberto Gonzali (Figareo, Mieres 1961) ye un escritor asturianu, xestor cultural y políticu, que ta consideráu como ún de los autores más destacaos d'Asturies. Foi miembru de l'asociación Conceyu Bable y profesor de llingua asturiana.
En 1985 ye nomáu secretariu nacional de la Xunta pola Defensa de la Llingua Asturiana, onde coordinó numberoses acciones de protesta pola denegación de derechos llingüísticos, destacando les promovíes ante la sanción al factor de FEVE de Nava por usar la toponimia tradicional. Xunto con Juan Bonifacio Lorenzo Benavente y Xicu Monteserín funda en 1988 Orbayando, revista asturiana d'información, que codirixe hasta l'añu 1990.
Nel 1990 crea con otros autores asturianos l'asociación Escritores y Traductores en Llingua Asturiana (ETLLA) de la que foi'l so presidente. Durante esta presidencia escribió, ente otros, a la ONU, a la UE, al Vaticanu, al Rei d'España, al presidente del Gobiernu Español y a tolos ayuntamientos asturianos, pidiendo un tratu dignu pa la llingua asturiana asina como la so oficialidá. En 1992 empobinó los trabayos que llevaron al envíu al gobiernu d'Asturies d'una Propuesta de Llei d'Usu y Protección de la Llingua Asturiana.
L’Alborada
..............ALBA 2009 Foto: A.VV. de Candás -14 de septiembre de 2009
L’Alborada ye unu de los eventos que más identifiquen el sentir candasín, como espeyu de la herencia social y cultural d’una villa que se resiste a perder la so identidá marcada pola mar. Al amanecerín del 14 entama l’actu, con recepción de les autoridaes y ofrenda floral nel muelle ante la estatua de La Marinera. A la entrada del puertu reparten claveles a los asistentes que s’empobinen p’hacia L’Almena.
Ellí toma la palabra’l Poeta del Alba, que compón un poema pa la ocasión. Salen les embarcaciones a la mar y échense corones de flores col toque de silenciu y oración. L’actu conclúi cola Diana Floreada, el Cantu de La Marinera y la danza n’arena de la dársena.
N’ediciones anteriores fueron Poeta del Alba escritores de prestixu como Aurora García Rivas, Luis Fernández Roces o Miguel Rojo, ente más otros. L’Alborada ta coordinada pol escritor José Marcelino García.
No hay comentarios:
Publicar un comentario